Wednesday, May 16, 2012

හෙටක් ගැන සිහිනය දකිම් (සුභ උපන්දිනයක්!)




සිනා මල් වැහි වලින් නැහැවුන
හෙටක් පතනෙමි හදවතින්
හදේ තවරා ඔබේ සුවඳම
හෙටක් ගැන සිහිනය දකිම්

පුරා නෙතුයුග පැතූ පැතුමන්
එකින් එක කවිකම් කරන්
සරා සඳ ඔබ නිශා අහසෙහි
රිදී පැහැ ගෑ ආදරෙන්

පුලුල් පපුතුර රැඳී සැනහෙමි
උණුහුමට තුරුලුව තුටින්
සිනාසෙනු මැන අපේ හෙට ගැන
පැතූ පැතුමන් ළඟ ඉතින්

ජීවිතේ එක් මංසලක් ළඟ
එක්ව බැඳි දෑඟිලි තුටින්
තුරුලු කරගෙන වසන්තය වෙත
ඇවිද යමු අපි එක සිතින්

සුභ උපන්දිනයක්!
05/16

Friday, May 4, 2012

පැතුමක් පතමු කෙලෙසුන් දුරලන හෙටක




පුර සඳ දිලෙන පෝ දා මුදු සිලි-සිලිය
සිසිලස සිතේ වේවා  සඳ විලස
සුදු වත සදන සුන්දර පිරිසුදු දසුන
සිත-සිත රැඳේවා පිවිතුරු සුදු පැතුම

පහනින් නැගෙන එලියෙන් දුරු වූ අඳුර
විලසින් දුරුව යාවා මෝහයෙ අඳුර
මුවඟින් නැගෙන සැනසුම් සුසුමක රහස
ඟැඹුරින් දැනේවා වෙසඟේ සිරි අතර

බුදු පා පුදන සුකොමල මල් නෙක පාට
මියෙනායුරු දකිමු පැන් යෙදුවත් බෝම
අතහැර යන දිනේ අදරැති හැම දේම
සිහිකර ගනිමු හොඳ සිතුවිලි මෙත්සාර

සුවඳින්, සුවඳ මිනිසත් බවෙහී සුවඳ
සුවයෙන්, සුවය සැනසුම ඇති නිසි දිවිය
පතමින් වෙසක් ආසිරි කාටත් තුටුව
පැතුමක් පතමු කෙලෙසුන් දුරලන හෙටක