නැඟිටපන්! (මම හීන වලට ආදරෙයි)

"නැඟිටපන්! ඉතිං නැඟිටපන්!!"

හැමෝම කියන්නෙ හීන මැවුවට වැඩක් නෑ කියලයි.... 

ඉතිං නැඟිටපන් ඔය නින්දෙන්....මළවිකාර බහුබූත! මොළේ කොළොප්පම් කරන ඔය හීනෙන්...!!

නෑ... මං හීන මැවුව තමා.... හුඟක්.... ඒත් මං නිදාගෙන උන්නෙ නෑ.... මේ දැනුත් හිත ඇතුලෙ මැවෙන හීන දකින්නෙ මං නිදාගෙන යැ?

මං දැක්ක හීන.... සීරුවට, ආදරෙන්, බලාපොරොත්තු තමා නින්ද.... 

ඇත්ත,සමහර හීන බිඳිල ගියා තමා.පුංචි කාලෙ ඉඳං පිළිවෙලට දැක්ක ඒ හීන කුඩුපට්ටම් වෙලා මං ඉස්සරහම කෑලි කෑලි ඉහිරෙද්දි! හ්ම් ඒක මහ වේදනාවක්. එතකොට දැනෙන අසරණකම. හෙහ්.! හිතෙනව තමා මට එපා හීන ආයෙම, ජීවිතේටම.... ඒත් හිත අස්සෙන් ආයෙ ආයෙ මතුවෙන හීන කෑලි අපූරුවට වේදනාව හෙමීට තුනී කරපු හැටි. මං හීන වලටත් ආදරේ ඒ හන්දා.

බිඳිච්ච හීනයක් ඇතුලෙන් ඉපදිච්ච හීන කවදාවත් තිබිල නැද්ද?

ඒ හීන හරි හොඳයි.මැරෙන්න යන හෙටක් ගැන ආදරයක් උපද්දන්න ඒවයෙ තියෙන්නෙ අමුතු බලාපොරොත්තවක්.

පුංචි කාලෙ ඔන්චිලි පදිද්දි තල්ලුවක් දාන්න කෙනෙක් නැතුව කණු කුණු ගාද්දි, මහ සද්දන්ත කජු ගහේ එක කොලයක් බඩේ ගැවෙන තරම් තාත්තා දාපු තල්ලුව!

 පුහ්!

 එදා මං පියාඹන්න මැවුව හීනේ හැබෑකරගත්ත කියල හිතාගත්තෙ පියාඹන එක මට ඒ හැටි හිතට ඇල්ලන එකක් නෑ කියල තේරුන හංද වෙන්නැති. ඉතිං ඕකට ඔයහැටි හිනාවෙන්න ඕනද, ඒ හංදනෙ මං ඔන්චිල්ලාව අක්කලට බාරදිල හැන්දෑවට තාතත එක්ක ඇවිදින් පුරුදු උනේ. 

හීන බොළඳ වෙන්න පුලුවං, නපුරු වෙන්න පුලුවං, බිඳිල යන්නත් පුලුවං. ඒත් හැම හීනයක්ම ජීවිතේට දෙන්නෙ අලුත් පිටුවක්. 

දවසක අපි අපේ ජීවිතේ ආයෙ කියවද්දි ඒක හීනවලින් පිරිල තියෙයි. අද නොහිතනාට එදාටවත් දැනෙයි.... බිඳුන, බිඳුව, අතහැරපු, අතඇරුන, හැබෑඋන හීන අස්සෙ අපේ ජීවිතේට තල්ලුවක් ලැබිල කියල. එදාටත් ඇඳෙයි හිනාවක්, ලස්සනට, ඒ හිනාවට ලොකු අර්ථෙකුත් තියෙයි. තවකෙනෙක්ගෙ හීනයක් දැකල හිනාඋන හදවත්ම තමංගෙ හීන, හංඟගෙන උනත්...  නොදැනුවත්වම දැකපු හීන! හොයාගනියි දවසක.

හීන දකින එක නෙවේ වැරැද්ද... ජීවිතේට හුස්මක් අරං එන හීන හැබෑ කරගන්න පුංචියට හරි උත්සහ නොකරන එක.

මං අහල තියෙනවා කවුදෝ කෙනෙක් කියල තියනව හින දකින අයට හිනාවෙන්න එපා කියල, හින නැති අයට ජීවිතයක් නැතිලු.

හීන කියන්නෙ බලාපොරොත්තු. අපි පොඩියක් උත්සහ කලොත් ඒව හැබෑවෙනවා.

හැම හීනයක්ම හැබෑනොවුනත්, හැබෑවෙන හීනත් පොඩ්ඩක්හරි තියෙනව. හැබෑ නොඋන හීනෙකින් ජීවිතේට දෙයක්... මොකක්හරි දෙයක් එකතුවෙනව. 

දැකපු හීන සේරෝම හැබෑ නොවුනත්, ලස්සනම හීන බිඳිල ගියත්, සමහර හීන මඟඇරුනත් මම තවම හීන දකිනව.

හැබෑඋන පුංචි පුංචි හීන වගේම ඒ හැබෑනොවුන හීන ඇතුලෙත් මම ජීවිතය දකිනව. 

මාව ඇහැරවන්න හදන්න එපා.

මං නිදි නෑ. 

මේ හීන ඇතුලෙ තියෙන්නෙ බලපොරොත්තු ඒඅතරින් ලැබෙන්නෙ අත්දැකීම්.

හීනයක් දැකල නැද්ද  කවදාවත්...පුදුමයි....

සමහරවිට ඔයා ඒවාට දීලඇත්තෙ වෙන නමක්!